ربـــاعيــــات صـــلاح جـــــاهــيــــن

خرج ابن آدم من العدم قلت : ياه
رجع ابن آدم للعدم قلت : ياه
تراب بيحياوحي بيصير تراب
الأصل هو الموت و الا الحياه ؟
عجبي !!!


و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
اه ياما فيه سؤالات من غير ردود
عجبي !!!


أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!


يا باب يا مقفول إمتي الدخول
صبرت ياما واللي يصبر ينول
دقيت سنين والرد يرجع لي : مين ؟
لو كنت عارف مين أنا كنت أقول
عجبي !!!


سهير ليالي و ياما لفيت و طفت
وف ليه راجع في الضلام قمت شفت
الخوف كأنه كلب سد الطريق
و كنت عاوز أقتله بس خفت
عجبي !!


عجبتني كلمة من كلام الورق
النور شرق من بين حروفها و برق
حبيت أشيلها ف قلبي قالت حرام
ده أنا كل قلب دخلت فيه اتحرق
عجبي !!!


ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!


ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي !!!


نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي !!


يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي !!!


شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني وإيه العمل
عجبي !!!


أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي !!


إيش تطلبي يا نفس فوق كل ده
حظك بيضحك وانتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!


إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان وخطوة كمان
يا اوصل نهاية السكة يا البير تجف
عجبي !!!


في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ ولا وصلت للفلسفة
عجبي !!!


الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي !!!


إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!


نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
عجبي !!!


- يا نجم..نورك ليه كده بيرتجف ؟
هو انت قنديل زيت؟أو تختلف
- أنا نجم عالي بس عالي قوي
و كل ما انظر تحت اخاف انحدف
عجبي !!!!


السم لو كان في الدوا منين يضر ؟
و الموت لو عدونا منين يسر؟
حط القلم في الحبر و اكتب كمان
.. والعبد للشهوات..منين هو حر؟
عجبي !!!


وقفت بين شطين علي قنطـرة
الكدب فين و الصدق فيـن يا تري
محتار ح اموت الحوت خرج لي وقالي
هو الكلام يتقـاس بالمسـطرة
عجبي !!!


سرداب في مستشفي الولاده طويل
صرخات عذاب ورا كل باب وعويل
..وفي الريق متزوقين البنات
متزوقين للحب و المواويل
عجبي !!


الدنيا أوده كـبيره للانتظار
فيها ابن أدم زيه زي الحـمار
الهم واحد والملل مشـترك
و مفيش حمار بيحاول الانتحار
عجبي !!


نسمة ربيع لكن بتكوي الوشـوش
طيور جميلة بس من غير عشـوش
قلوب بتخفق إنما وحـدها
هي الحياه كده كلها في الفاشوش
عجبي !!!!


كروان جريح مضروب شعاع م القمر
سقط من السموات فؤاده انكسـر
جريت عليه قطه علشان تبلعــه
أتاريه خيال شعراء و مالهـوش أثر
عجبي !!!


ياللي نصحت الناس بشـرب النبيت
مع بنت حلوه وعود, وضحك , وحديت
مش كنت تنصحهم منين يكسـبوا
تمن ده كله ؟ والا يمكن نسـيت
عجبي !!


ما حد في الدنيا واخد جزاتـه
و لا حــد بيفكر في غير لذاذاته
ما تعرفيش يا حبيبتي أنا و انتي مين؟
إنتي عروس النيل و أنا النيل بذاته
عجبي !!


رقاصه خرسا و رقصه من غير نغــم
دنيا يا مين يصالحها قبل النــدم
ساعتين تهز بوجههـا يعنـي
يترجرجوا نهديها يعني نعــم
عجبي !!!


إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـفرس
الدنيا قالت قام خطفهاالشيطان
عجبي !!!!


من بين شقوق الشيش و شقشقت لك
مع شهقة العصافير و زقزقـت لك
نهار جديد انا قوم نشوف نعمليه
انا قلت يا ح تقتلني ياح اقـتلك
عجبي !!!


جالك أوان ووقفت موقف وجـود
يا تجود بده يا قلبي يا بده تجـود
ما حد يقدر يبقي علي كل شــئ
مع إن –عجبي– كل شئ موجود
عجبي !!!


جالك اوان وعرفت مشي الجنايز
كيف شفتها يا عبد رب اللذايذ
قال : شفت شيل بالحيل فقير أو امير
كما شالوا في الخمامير فواضي القزايز
عجبي !!


أنا كنت شئ و صبحت شئ ثم شـئ
شوف ربنا قادرعلي كل شـئ
هز الشجر شواشيه ووشوشني قال:
لابد ما يموت شئ عشان يحيا شئ
عجبي !!


يا مشرط الجراح أمانة عليك
و انت ف حشايا تبص من حواليك
فيه نقطة سوده في قلبي بدأت تبان
شيلها كمان والفضل يرجع إليك
عجبي !!!


كيف شفت قلبي والنبي يا طبيـب
همد و مات و الا سامع له دبيب
قاللي لقيته مختنق بالدمـوع
و ما لوش دوا غير لمسه من إيد حبيب
عجبي !!!!


تسلم يا غصن الخوخ يا عود الحطـب
بييجي الربيع .. تطلع زهورك عجب
و انا ليه بيمضـي ربيع وييجي ربيع
و لسه برضك قلـبي حتة خشب
عجبي !!!


قلبي عليل يا ناس و في الكاس دواه
مديت له إيدي شربت م اللي حـواه
جنبي الشمال خف اليمين اتوجع
و إيه يداوي الكبد م اللي كـواه
عجبي!!


دي مزكرات و كتبتها من سـنين
في نوتة زرقا لون بحور الحنيـن
عترت فيها رميتها في المهملات
وقلت صحيح أما صحيح كلام مخبولين
عجبي !!


دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشـتا
لكن حاجات أكتر بترفض تموت
عجبي !!


- الدنيا من غير الربيع مـيته
ورقة شجر ضعفانه و مـفـتـته
- لا يا جدع غلطان تأمل وشوف
زهر الشتا طالع في عز الشـتا
عجبي !!!


ياللي انت بيتك قش مفروش بريش
تقوي عليه الريح يصبح مفيش
عجبي عليك حواليك مخالب كبار
و ما لكش غير منقار و قادر تعيش
عجبي !!!!


سمعت نقطة ميه جوه المحيط
بتقول لنقطه ما تنزليش في الغويط
أخاف عليكي م الغرق قلت أنا
ده اللي يخاف م الوعد يبقي عبيط
عجبي !!!


بحر الحياه مليان بغرقي الحياه
صرخت خش الموج في حلقي ملاه
قارب نجاه صرخت قالوا مفيش
غير بس هوالحب قارب نجاه
عجبي !!!


فارس وحيد جوه الدروع الحديد
رفرف عليه عصفور وقال له نشيد
منين منين و لفين لفين ياجدع
قال من بعيد و لسه رايح بعيد
عجبي !!


كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي !!


النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي !!!


صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي !!!!


كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني ليه
خجلان تقول انك سعيد يا ولد
عجبي !!!


مزيكة هادية الكون فيها انغمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر؟
عجبي!!


إنشد يا قلبي غنوتك للجمال
و ارقص في صدري من اليمين للشمال
ما هوش بعيد تفضل لبكره سعيد
ده كل يوم فيه الف الف احتمـال
عجبي !!


آه لو انا و محبوب جزنا الفضـا
في سفينة وحدينا واشيا رضـــا
ساعة صفا تعجبنا نرجع لهـا
و الهم قبل ما ييجي يبقي مضـى
عجبي !!


حدوته عن جعران و عن خنفسـه
اتقابلوا حوا بعض ساعة مسـا
و لا قال لهم حد اختشوا عيب حـرام
و لا حد قال دي علاقة متدنسـة
عجبي !!!!


ياللي عرفت الحب يوم و انطــوي
حسك تقول مشتاق لنبع الهـوي
حسك تقول مشتاق لنبع الغـرام
ده الحب مين داق منه قطره ارتوي
عجبي !!!


زحام و أبواق سيارات مزعجة
للي يطول له رصيف يبقي نجا
لو كنت جنبي يا حبيبي أنا
مش كنت أشوف إن الحياة مبهجة
عجبي!!


إيديا في جيوبي وقلبي طـرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف أو باقترب
عجبي !!


يا ميت ندامه ع القلوب الخـلا
لا محبة فيها و لا كراهـه ولا
حتي يا قلبي الحزن ما عادش فيك
معلهش لك يوم برضه راح تتملا
عجبي !!


مرحب ربيع مرحب ربيع مرحبه
يا طفل يا للي ف دمي ناغا وحبا
علشان عيونك يا صغنن هويت
حتي ديدان الأرض والأغربة
عجبي !!!


فتحت شباكي لشمس الصباح
ما دخلش منه غيـر عويل الرياح
و فتحت قلبي عشان ابوح بالألـم
ما خرجش منه غير محبه و سماح
عجبي !!!!


غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون و ليه
رسمت ورده وبيت و قلب و علم
عجبي !!!


انا الذي عمري اشتياق في اشتياق
و قطر داخل في محطة الفراق
قصدت نبع السم وشربت سـم
من كتر شوقي وعشمي في الترياق
عجبي !!!


لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شـئ
انا كنت اجيب للدنيا ميت ألف ابن
عجبي !!


العشب طاطا للنسايم و نخ
أخضر طري مالهش في الحسـن أخ
عصفور عبيط انا غاوي بهجه و غنا
ح انزلهنا و انشا لله يهبرني فخ
عجبي !!!


أوصيك يابني بالقمر و الزهـور
أوصيك بليل القاهرة المسحـور
و إن جيت في بالك إشتري عقد فل
لأي سمرا وقبري إوعك تـزور
عجبي !!!!


غمض عينيك وارقص بخفة و دلع
الدنيا هي الشابة وانت الجدع
تشوف رشاقة خطوتك تعبدك
لكن انت لو بصيت لرجليك تـقع
عجبي !!!


حاسب من الاحزان و حاسـب لها
حاسب علي رقابيك من حبلها
راح تنتهي و لابد راح تنتهـي
مش انتهت أحزان من قبلها؟
عجبي !!!


يأسك و صبرك بين إيديك و انت حر
تيأس ما تيأس الحياه راح تمر
أنا دقت مندا ومندا عجبي لقيت
الصبر مر و برضك اليـأس مر
عجبي !!


ولدي نصحتك لما صوتي اتنبح
ما تخفش من جني و لا من شبح
و ان هب فيك عفريت قتيل إسأله
ما دافعش ليه عن نفسه يوم ما اندبح
عجبي !!


ولدي إليك بدل البالون ميت بالون
انفخ وطرقع فيه علي كل لون
عساك تشوف بعينك مصيرالرجال
المنفوخين في السترة والبنطلون
عجبي !!!


خوض معركتها زي جدك ما خـاض
صالب و قالب شفتك بامتعاض
هي كده ما تنولش منها الأمل
غير بعض صد ورد ووجاع مخاض
عجبي !!!!


منين أجيبها كلمه متألمة
لعيبه فايره حايره و مصممـه
منين اجيبها كلمه تكون بنت ارض
تشفي اللي ما شافهوش كلام السمـا
عجبي !!!


أنا قلت كلمة و كان لها معنيين
كما بطن واحده و توأمين زي وشين
لو دنيا شرالتوأم الخير يموت
لو دنيا خير الشر ح يعيش مــنين
عجبي !!


أنا اللي بالأمر المحال اغتوي
شفت القمر نطيت لفوق في الهـوا
طلته ما طلتوش إيه انا يهمني
و ليه ما دام بالنشوة قلبي ارتوي
عجبي !!


بره القزاز كان غيم و أمطار و برق
ما يهمنيش –أنا قلت– و لا عندي فرق
غيرت رأيي بعد ساعة زمان
و كنت في الشارع و في الجزمة خرق
عجبي !!!


عيني رأت مولود علي كتف أمـه
يصرخ تهنن فيه يصرخ تضـمه
يصرخ تقول يا بني ما تنطق كلام
ده اللي ما يتكلمش يكتر همه
عجبي !!!!


يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمـا
كتم الغنا هو اللي ح يموتك
عجبي !!!


ياللي بتبحث عن إله تعـبده
بحث الغريق عن أي شئ ينجـده
الله جميل و عليم و رحمن رحـيم
أجمل صفاته وانت راح توجده
عجبي !!!


حقرا و فوق كوكب حقير محتقر
في الكون تكون دنياكو إيه يا بقر
رملايه من صحرا ؟ لكين إيش تقول
و الكون بحاله جوه عقل البشـر
عجبي !!


لا تجبر الانسان و لا تخـيره
يكفيه ما فيه من عقل بيحيره
اللي النهارده بيطلبه و يشتهـيه
هو اللي بكره ح يشتهي يغيره
عجبي !!


البط شال عدي الجبال و البحور
ياما نفسي اهج احج ويا الطــيور
أوصيك يا ربي لما اموت و النبي
ما تودنيش الجنه للجنه سـور
عجبي !!!


طال انتظاري للربيع يرجع
و الجو يدفا والزهور تطلع
عاد الربيع عرمرم شباب
إيه اللي خلاني ابتديت افزع ؟
عجبي !!!


عاد الربيع كأنه طعم الحــب
و الحب نار جوه العروق بتصـب
اتمتع ازاي بيه وانا متقطع
من كتر خوفي لا في الخطيئة يطب ؟
عجبي !!


ازاي شبابنا يقوم و ياخـد دوره
من غير صراخ يئذيه و يجرح زوره
يا هلتري أحسن له يقعد ساكت
أو ينترك و لو خرج عن طوره ؟
عجبي !!!


عيني رأت عصفور ووياه ابنه
بيحدفه في الريح و ياخده ف حضنه
نوبتين و تالت نوبه –عجبي عليهم–
كانوا سوا بيرفرفرا و يغنوا
عجبي !!!!


احسن ما فيها العشق و المعشقـة
و شويتين الضحك والتريقـة
شفت الحية لفيت لقيت الألذ
تغييرهاو ده يعني التعب والشقا
عجبي !!!


عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبي !!!


في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي !!


وقفت ساعة الصبح باغسل سناني
قالت لي شايف قوتي و لمعاني؟
إيش تطلب اليوم مني ضحكة أسد؟
والا ابتسامة اعلانات أمريكاني؟
عجبي !!


الحلو يم اليم صابـح رايح
سارح في حضن الميه سابح سايح
الحلو داب في البحر, قلت أدوقه
وجدت لسه البحر برضك مالح
عجبي !!!


يا كل كلمة للعجب في قامـوس
انسكلوبيديا لسان العرب أو لا لاروس
تعالوا نجدة ده لسه في عصـرنا
الشمس و البحر العريض بالفلوس
عجبي !!!!


الموج تلول تهبط وتطلع تلول
يا بحر خدني الشط صاحبك ملول
و الا بلاش الشط ح اعمل به أيه
ده ريحته طحلب مهري و ام الخلول
عجبي !!!


ما آنتاش بتلعب ليه يا روح بابا؟
و لا عسكري و لا لص في عصابة ؟
إلعب أسد أو ديب رهيب أو غـزال
دي الدنيا في نهاية المطاف غابة
عجبي !!!

ورد في ورق سلوفان يا حلوة اهديلك؟
و الا انقله بالطين في الشتلة واجيلك
الأولاني لو وحا بحناني
عجبي علي التاني بإيه يوحيلك
عجبي !!


الأرض شوك أيوه لكين هايش
و الحمرة مش يعني الطريق حايش
دي دمنا السيال وبشرة خيـر
ان انتي عايشة و ان كنت أنا عايش
عجبي !!!


إيه اللي خدته من مرور السنين
يا قلبي الا دمعتك و النيـين
بتئن و ترجع و بتفرح و ترجع تحـن
مع إن مش كل البشـر فرحانين
عجبي !!!!


اوقات أفوق و يحل عني غبايا
واشعر كأني فهمت كل الخبايا
و افتح شفايفي علشان اقول الدرر
ما أقولش غير حبة غزل في الصبايا
عجبي !!!


عيني رأت مخلوق في غاية البشاعة
أنا قلت له لما تأملته ساعـة
اللذه و الموت علموك اللزج
و انا علموني الفلسفة و الشجاعــة
عجبي!!


علقت في المسمار قناع مهزلة
ومعاه قناع مأساة بحزنه ابتلا
بصيت لقيتهم يشبهوا بعضهـم
واهو ده العجب يا ولاد والا فلا
عجبي !!


لولا اختلاف الرأي يا محـترم
لولا الزلطتين ما لوقودانضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي !!!!


يا وردة قلبي معاكي في الريح لعب
لا تعبتي م الريح و لا قلبي تعـب
احنا كده:نرتاح في صخب الجنون
و في السكون بنخاف قوي و نترعب
عجبي !!!


مركب ورق من نفخة تتطـوح
ركبتها و الكل بيلوح
سوحت فيها اتنين و خمسين سنه
للآن ... و لا بتغرق و لا تروح
عجبي!!


عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديد
قد اللي ماشي .. وتحت باطه كتاب
عجبي !!


يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمل
وازاي تكفيني لباب القبر؟
عجبي !!


حتة محارة وجدتها في يوم لقية
قالت لي شوف كيف الطبيعة شقية
نظرت للكهف اللي فيها و لقيت
إن الطبيعة كمان لا أخلاقية
عجبي !!!!


بلياتشو قال إيه بس فايدة فنوني ؟
و تلات وقق مساحيق بيلونوني
و الطبل و المزامير و كتر الجعير
إذا كان جنون زبوني زاد عن جنوني
عجبي !!!


نقطة مرارة كمان علي مشروبي
دوبها يا ساقي حسب مطلوبي
طعب الحياة مش برضه فيها و فيها ؟
ليالي وردي و نهارات خروبي ؟
عجبي!!


وسط الحطام اتفرجوا يا أنام
تمثال ملك و مبوله م الرخام
لتنين نحتهم نفس أسطي الحجر
و كانوا ذات يوم كتلتين لسه خام
عجبي !


عيد و العيال اتنططوا ع القبور
لعبوا استغمايه و لعبوا بابور
و باللونات و نايلونات شفتشي
و الحزن ح يروح فين جنب السرور
عجبي !!


أنا قلبي كورة و الفراودة أكـم
ياما اتنطح و انشاط و ياما اتعكـم
و اقول له كله ح ينتهي في المعاد
يقول بساعتك ؟ و الا بساعة الحكم ؟
عجبي !!!


الضحك قال يا سم ع التكشير
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر
عجبي !!!!


أهوي الهوي و همس الهوي في العيون
وبسمة المغرم ودمعه الحنون
و زلزلات الحب نهد الصبا
أكون انا المحبوب أو لا أكون
عجبي !!!


يا ملونين البيض في شم النسيـم
لون الحنين و الشوق و خمر النديم
ما تعرفوش سايق عليكو النبي
تلونوا الأيام بلون النعيم؟
عجبي!!


الدنيا صندوق دنيا دور بعـد دور
الدكة هي و هي كل الديكـور
يمشي اللي شاف ويسيب لغيره مكان
كان عربجي أو كان امبراطور
عجبي !!!!


قالوا السياسة مهلكة بشكل عام
و بحورها يا بني خشنة مش ريش نعام
غوص فيها تلقي الغرقانين كلهم
شايلين غنايم و الخفيف اللي عام
عجبي !!!


سلام سلام سلام سلام.. سلام
كلام كلام كلام كلام.. كلام
هز الورق يا صاحبي كدهــــوه
يطلع كلام سلام.. و سلام كلام
عجبي !!!!


فوق تحت ورا قدام يمين شمال
في الجو تحت الميه أو في الرمال
طلب الكمال يحرم علي الممكن
و الممكنات دول محرومين م الكمال
عجبي !!!


هات يا زمان و هات كمان يا زمان
غير بسمة الشجعان مامني يبان
هو اللي داق الفرحة يوم ثورتـه
يقدر يعود و لا ثانية للأحـزان ؟
عجبي!!!!!


عبثا باقول واقرا في سورة عبس
ماتلومش حد إن ابتسم أو عبس
فيه ناس تقول الهزل يطلع جـد
و ناس تقول الجد يطلع عبـث
عجبي !!!!


قالوا ابن آدم روح و بدنه كفن
قالوا لأ بدن . قالوا لأ ده روح في بدن
رفرف فؤادي مع الرايات في الهوا
أنا قلت لأ روح في بدن في وطـن
عجبي !!!